Faiga Faavae Faasinoala

E faasino atu e le faiga faavae tulaga patino mo oe ma le isi laasaga e fai.

• Lanu meamata: A e iai i le vaega lanu meamata, o lena e sologa lelei e tusa ai ma le tausisia o tuutuuga.
• Lanu Moli: E sui lou tulaga i le lanu moli pe afai e le i tausisia tuutuuga toe leai se mafuaaga tatau ua lē tausisia ai. O lona uiga e moomia na e faafesootai mai loa le ofisa i le taimi lea. A e lē faafesootai mai le ofisa ma fai se suiga i totonu o le 5 aso faigaluega, ona sui lea o lou tulaga i le vaega lanu mūmū.
• Lanu mūmū: O le taimi lava ua sui ai lou tulaga i le lanu mūmū, ona tuuitiitia pe taofi loa lau penefiti. A tuuitiitia pe taofi lau penefiti, e moomia na e faafesootai mai loa le ofisa e toe foi ai i se tulaga lelei.

Faafesootai mai loa, pe a iai se mafuaaga ua lē mafai ai na tausisia tuutuuga na fai. O le a taumafai e faafesootai atu a o le i suia lou tulaga i le lanu moli, pe afai e te le i fesootai mai lava, e iloa ai mafuaaga ua lē tausisia ai tuutuuga na fai.

E lafo atu se tusi e faailoa atu ai le sui o lou tulaga i le lanu moli po o le lanu mūmū. E mafai foi na e maua i le MyMSD le lanu o le faasinoala ua e iai. 

O ai e faatatau iai le faiga faavae faasinoala

E faamauina se tasi i le faiga faavae faasinoala pe afai na avatu tuutuuga e fesootai i se galuega ma/po o tulaga masani. O tuutuuga nei:

• sue pe sauni mo se galuega
• auai i le polokalame Work Ability Assessments, e iloa ai le ituaiga galuega e te mafaia
• auai i polokalame ua saunia e faalapotopotoga o matou galulue faatasi, e sue se galuega po o le sauni ai mo se galuega
• tuutuuga tulaga masani (mo le tausiga o fanau e ola faalagolago ia te oe).

A e maua se Youth Payment, Young Parent Payment pe iai se faufautua mo tupulaga o fesoasoani i lau mataupu, o lona uiga e faamauina lou tulaga i le faiga faavae faasinoala ae ese tuutuuga e fai mo oe. Tatala le upegatafailagi a le Youth Services e te iloa ai tuutuuga mo tulaga faapenei.

Tuutuuga mo i latou o maua se penefiti e sue ai se galuega ma/po o tulaga masani

E iai tuutuuga lua te tausisia ma lou toalua e sue ai se galuega ma/po o tulaga masani pe a maua se tasi o penefiti nei:

• Jobseeker Support, po o le
• Sole Parent Support

E iai tuutuuga mo tupulaga pe afai e le i atoa le 18 tausaga o lou toalua. O lona uiga e faamauina lou toalua i le faiga faavae faasinoala ae ese tuutuuga na te tausisia.

Atonu lua te tausisia ma lou toalua tuutuuga e sue ai se galuega ma/po o tulaga masani pe a maua se tasi o penefiti nei:

• Emergency Benefit, po o le
• Emergency Maintenance Allowance.

E iai isi tuutuuga e tatau na e tausisia. A e fia iloa le tulaga e te lua oo i ai ma lou toalua pe a lē tausisia isi tuutuuga na avatu, tagai i le 'When you don't meet your obligations.'

Supported Living Payment

O le toatele o tagata o maua le Supported Living Payment e lē faatulagaina i le faiga faavae faasinoala. Talu ai e leai se tuutuuga e tatau ai na sue se galuega.

Faatoa faamauina lou tulaga i le faasinoala pe afai:

• o lena e vaai tamaiti e ola faalagolago ia te oe, o lona uiga e iai tuutuuga mo tulaga masani (faatino tiute talafeagai e pei o le ave tamaiti e vaai le fomai ma ave i le aoga)
• na faamaonia ua gafatia na e faigaluega ma o se fuafuaga na tatou talanoa i ai (toaitiiti tagata e maua i le tulaga lea), po o le
•  talosagaina lou auai i le polokalame Work Ability Assessment po o le faigaluega ma se tasi o konekarate o matou galulue faatasi (e toaitiiti tagata e faatalosagaina e auai i avanoa faapenei).

E ono ese tuutuuga e tausisia e lou toalua, pe a ua fai sou aiga. O lona uiga e mafai na aofia lou toalua i le faiga faavae faasinoala, tusa lava pe afai e le o se tulaga lea o aafia ai oe.